Dờp jơnau jà bơh Đảng dà lơgar he dê, Mpồl kwang bàng kâp dờng Đảng Kộng sản Cuba bơh Ủy viên Ƀộ Cíñ trị, Thường trựk Ƀan Ƀí thư Đảng Kộng sản Cuba ồng Roberto Morales Ojeda lam bồ lòt còp mờ lơh broă tàm lơgar Việt Nam mờ đơng lam bal Dơ̆ cribơyai jơnau tàm sră pơ àr dơ̆ 5 đah 2 Đảng, bơh ngai 30/4 tus ngai 04/5/2023. Mho ngai 03/5, tàm Hìu lơh broă Củ tịc, Củ tịc lơgar ồng Võ Văn Thưởng wă Mpồl kwang bàng kâp dờng Đảng Kộng sản Cuba.

Củ tịc lơgar ồng Võ Văn Thưởng ai tơnggŏ bơta chờ hờp bè bơta bơtàu tơnguh niam bơnĕ bơh bơta git gơp 2 Đảng, 2 dà lơgar tàm ală nam do; đơs nền Việt Nam sùm jat sền mờ jơh nùs tam pà ală kal ke, bơta lòng tài jơnau kơryan mờ jơnau gơ lời wơl bơh trồ tiah lơh aniai, ồs sa rềp ndo; pin dờn là, Đảng, Dà lơgar mờ làng Cuba rơp pơn jat tai lơh geh cồng nha dờng màng tàm gùng sền gàr cồng nha kac màng, bơt bơtàu củ nghĩa xã hội tàm bồt khat gơboh mờ pơn jat tai là bồng bi lam lài tàm Mỹ Latinh. Củ tịc lơgar sồr 2 gah pơn jat tai rề ơnàng mờ tơnguh cồng nha lơh broă bal đah 2 lơgar tàm ală gah; pơgồp bal jơh nùs, tàm dong kờl bal mờ gơp tàm ală dơ̆ cribơyai dunia; sơlơ tơnguh lơh broă bal di mờ bơta geh ngan, bơta ƀuơn mờ bơta pràn lơh broă bal đah 2 Đảng, 2 lơgar.

Lài mờ hơ̆ tàm ngai òr (03/05), Đảng Kộng sản lơgar Việt Nam mờ Đảng Kộng sản lơgar Cuba neh ring bal bơyai lơh Pơrjum cri bơyai Lý luận dơ̆ V. Cri bơyai geh tơngu me “Ờ uă broă lý luận mờ mùl màl bè bơ̆t bơtàu CNHX tàm lơgar Việt Nam mờ lơgar Cuba”. Tus bal pơrjum cri bơyai geh ală kwang bàng đơng lam kấp dờng đah bàr đảng, kwang đơng lam ală gah, ƀộ, mpồl lơh broă dà lơgar, ală cau lơh broă kơlôi sơnơng lý luận mờ khoa họk đah lơgar Việt Nam mờ lơgar Cuba. Đơs tàm dơ̆ sơnđờm Pơrjum cri bơyai, ồng Nguyễn Xuân Thắng, Kwang atbồ Họk viện Cíñ trị Dà lơgar Hồ Chí Minh đơs tờm broă tam pà jơnau mờng chài, ală broă lý luận mờ mùl màl tàm broă bơ̆t bơtàu CNXH tàm lơgar Việt Nam mờ lơgar Cuba là tơngu me lơh broă bal kwơ màng đah bàr Đảng dê nàng tơnguh jơnau git wă rơlao tai, đềt mềr rơlao tai mờ lơh pràn rơlao tai bơta git gơ̆p kwơ màng niam bơnĕ đah bàr đảng mờ làng bol bàr lơgar dê. Tàm broă bơyai lơh Pơrjum cri bơyai, ală kwang bàng bal mờ ală cau lý luận, nùs nhơm bơh bàr đảng neh yal jơnau mờ cri bơyai bal ală jơnau đơs niam bơnĕ ngan bè lý luận mờ mùl màl ală tơngu me geh tơngŏ nùs nhơm yal tơngit bè: bơ̆t bơtàu mờ tơnguh bơtàu đảng tàm ală bơnah lơh sa; bơ̆t bơtàu mờ tơnguh bơtàu mpồl kwang bàng, tàm hơ̆ uă ngan là kwang bàng lơh broă jŏ jòng; broă bơto bơtê cíñ trị nùs nhơm niam tàm ơruh pơnu; atbồ jơnau yal mblàng, gàr niam bơta lơngăp lơngai tàm internet; bơ̆t bơtàu lơh sa kă bro jăt gùng dà XHCN lơgar Việt Nam dê mờ tơrgùm jơh lơh sa mpồl bơtiàn lơgar Cuba dê...