Củ tịc lơgar đơs là, broă bàr lơgar gàr sùm ală dơ̆ tàm pơgơl mpồl kwang bàng lòt còp bal mờ gơ̆p, ngan là mpồl kwang bàng kâp dờng đah 2 lơgar dê, geh gơtha kwơmàng ngan tàm broă chồl tơnguh gĭt gơ̆p lơh broă bal đah 2 lơgar. Củ tịc lơgar kung jờng rơ ngan mò Michelle Bachelet tàm gơnoar broă Kao ủy Gơnoar kòn bơnus bơh Liên hợp quôk dê neh geh uă tă pơgồp jơh nùs tàm ală broă lơh bal bơh Liên hợp quôk mờ mpồl bơtiàn dunia dê. Bè bơta pràn lơh broă bal đah 2 lơgar, mò Michelle Bachelet đơs là, jơh bal Việt Nam mờ Chile ndrờm là lơgar tàm Mpồl duh broă gơnoar kòn bơnus bơh Liên hợp quôk dê; ndrờm lơh jăt bal Hiệp địñ Tam klăc lơh broă bal Tơl làm mờ Gơguh jak gùt Thái Bình Dương. Do là bơta bal kwơmàng nàng 2 lơgar sơlơ tơnguh tai gĭt gơ̆p lơh broă bal tàm tơngai tus. Mò Michelle Bachelet kung sồr 2 gah lơh broă bal, tàm sơm băt tê bal lơh jăt ală jơnau kờñ bal bơh mpồl bơtiàn dunia dê tài ring lơngai mờ bơtàu tơnguh.