Chờ hờp wă rò ồng Thongsavanh Phomvihane dơ̆ sơnrờp lòt còp lơgar Việt Nam tàm gơnoar broă pa, Củ tịc lơgar ồng Võ Văn Thưởng pin dờn, đơs: dơ̆ lòt còp rơ̆p chồl tơnguh pràn kơldang gĭt gơ̆p lơh broă bal đah bàr Mpồl Lơh broă mờ lơgar ndai bàr Đảng dê; pơgồp bơnah tơnguh uă rlau tai cồng nha lơh broă bal tơl làm đah bàr Đảng, bàr Dà lơgar tàm tơngai tus.

Kwang ătbồ Mpồl Lơh broă mờ lơgar ndai Dà lơgar Đảng Làng bol Kăc màng lơgar Lào dê pà gĭt: bàr anih lơh broă do sùm bơyai lơh ală broă lơh tàm pơgơl mpồl kwang bàng lòt còp bal mờ gơ̆p; ring bal broă rơndăp lơh lơh broă, lơh broă bal tàm nam 2023 mờ cribơyai bal ală broă sền gròi bal kung bè pơlam gùng dà lơh broă bal tàm tơngai pơn jăt tai. Củ tịc lơgar sồr bàr Mpồl Lơh broă mờ lơgar ndai Dà lơgar bơh bàr Đảng dê pal sơlơ tàm yal tơngĭt bal bơta mờng chài tàm jơh ală gah broă lơh broă bal mờ nùs nhơm đềt mềr tàm broă lơh mờ bềng nùs nhơm oh mi dùl bồ tơngoh kơlôi sơnơng bal; pơn jăt tai tam pà bal mờ tàm dong kờl bal tàm ală dơ̆ cribơyai tàm kơnhoàl ù tiah do mờ tàm dunia.