Tàm dơ̆ wă rò, Củ tịc lơgar ồng Võ Văn Thưởng chờ hờp sền gŏ gĭt gơ̆p lơh bơyô ờs mờng bơh yau mờ lơh broă bal niam bơnĕ đah bàr lơgar pơn jăt tai bơtàu tơnguh niam ngan. Bàr gah lơh sùm tàm pơgơl mpồl kwang bàng lòt còp bal mờ gơ̆p mờ tìp măt đah kwang đơng lam bồ ală kâp. Gĭt gơ̆p lơh sa, kă bro, bơcri priă 2 gah geh ală bơta bơtàu tơnguh pràn ngan. Di tàm dơ̆ do, Củ tịc lơgar ồng Võ Văn Thưởng sền dờng màng ưn ngài lơgar Bỉ mờ UNICEF lơgar Bỉ, kung bè să tờm Pơ ùr Bơtau lơgar Bỉ dê mò Mathilde neh sùm lòt bal, dong kờl mờ lơh broă bal mờ lơgar Việt Nam tàm broă sền gàr mờ dong kờl kơnòm dềt; lời ai uă priă jền kwơmàng dong kờl lơgar Việt Nam tàm broă tơnguh uă cồng nha sền gàr dong kờl kơnòm dềt. Jờng rơ ngan ală jơnau sồr bơh Pơ ùr Bơtau dê bal mờ Mpồl dê, Củ tịc lơgar Việt Nam kơ̆p kờñ UNICEF lơgar Bỉ pơn jăt tai dong kờl lơgar Việt Nam lơh sir gùng dà broă lơh, adat boh lam gơrềng tus kơnòm dềt; pơn jăt tai lời ai priă jền dong kờl lơgar Việt Nam, ngan là tàm ală broă: bơto bơtê, lơh sơnơm nàng lơgar Việt Nam lơh jăt niam rlau broă sền gàr, dong kờl mờ bơto bơtê kơnòm dềt tàm tơngai tus.