Củ tịc lơgar ồng Võ Văn Thưởng pin dờn dơ̆ lòt còp rơ̆p pơgồp bơnah dờng màng sơlơ tơnguh pràn bơta gĭt gơ̆p lơh bơyô bal bơh yau mờ lơh broă bal uă gah đah lơgar Việt Nam mờ Czech.

Củ tịc lơgar đơs nền, Dà lơgar mờ làng bol Việt Nam sùm sền dờng màng mờ kơ̆p kờñ sơlơ tơnguh bơta gĭt gơ̆p lơh bơyô bal bơh yau đah 2 lơgar dê bè ală bơta kah yau rlau 70 nam do tàm jơh ală gah broă. 2 gah ring bal pơn jat tai pơgồp bal niam, dong kờl bal mờ gơ̆p tàm ală dơ̆ cribơyai uă lơgar, mpồl dunia, ngan là tàm Liên hợp quôk, ASEM, tàm tơngume lơh broă bal ASEAN– EU nàng tă pơgồp ai bơta ring lơngai, lơh broă bal mờ bơtàu tơnguh tàm tiah do mờ tàm dunia. Bè broă lơngap lơngai, tàm hơ̆ geh Dà lềng tiah đah mat tơngai lik, kwang đơng lam bồ 2 gah đơs sùm bơta kờñ pal geh pal bơsong ală tam pìt tam phà mờ ală broă lơh ring lơngai, tàm hơ̆ geh broă cribơyai broă mờ lơgar ndai mờ adat boh lam di pal mờ adat boh lam dunia dê, ngan là Kông ươk bơh Liên hợp quôk dê bè Adat Dà lềng (UNCLOS) 1982.