Jờng rơ mờ gờm chờ Thủ tướng lơgar Malaysia dơ̆ sơn rờp còp lơgar Việt Nam tàm gơnoar broă Thủ tướng, Củ tịc lơgar đơs sùm dơ̆ lòt còp dong lơh geh bơta pràn pa ai bơta gĭt gơ̆p lơh broă bal jŏ jòng đah 2 lơgar.

Gờm chờ Cíñ phủ lơgar Malaysia neh lam lơh geh cồng nha ală broă lơh bơtàu tơnguh lơh sa, mpồl bơtiàn, Củ tịc lơgar pin dờn, lơgar Malaysia rơ̆p lơh geh cồng nha Broă rơndap lơh 5 nam dơ̆ 12 mờ broă lơh kwơ màng Malaysia Madani, dong dà lơgar bơtàu tơnguh kơ̆ kơl jap mờ bơtàu tơnguh sùm, geh gơnoar broă mờ kơnòl broă ngai sơlơh uă tàm tiah do mờ tàm dunia. Bàr nă kwang đơng lam bồ jờng rơ bơtàu tơnguh bơta gĭt gơ̆p tàm jơh bal gah Đảng, Dà lơgar, Cíñ phủ; lơh pràn lơh broă bal sền gàr dà lơgar, lơngap lơngai, lơh sa, kă bro, bơcri priă, bơto bơtê, lòt nhơl, niam chài, tìp mat lơh kuèng làng bol.