VOV4.K’ho- Drim ngai 11/08, tàm Hà Nội, Củ tịc lơgar ồng Nguyễn Xuân Phúc, kwang atbồ Mpồl đơng lam bơt bơtàu rơndap broă lơh “Broă lơh jŏ jòng bơt bơtàu mờ lơh sir dà lơgar gơnoar adat boh lam Xã hội Củ nghĩa Việt Nam tus nam 2030, pơlam gùng dà tus nam 2045” đơng lam dơ̆ lơh broă bơh Thường trực Mpồl đơng lam mờ Hội đồng lý luận dà lơgar. Do là dơ̆ lơh broă ndŭt ndơl bơh Thường trực Mpồl đơng lam dê nàng iăt, kơno ală jơnau đơs lơh sir rơndap cih rơndap broă lơh lài mờ tŭ yal mờ Ƀộ Cíñ trị in.

Củ tịc lơgar ồng Nguyễn Xuân Phúc đơs tàm dơ̆ lơh broă

Củ tịc lơgar ồng Nguyễn Xuân Phúc đơs loh jat tàm bơnàng jă jơnau đơs tă pơgồp bal bơh ală anih lơh broă, mpồl cau mờ ală kwang bàng Mpồl đơng lam dê, tàm hơ̆ geh uă jơnau đơs bơh Hội đồng lý luận dà lơgar, bơh uă dơ̆ tam gơl, tus tŭ do rơndap cih rơndap broă lơh neh geh ală bơta tam gơl kwơ màng ngan jat gùng dà tơnguh bơta tơrgùm bal bơh Nghị quyết dê uă rlau tai, pơlam gùng dà broă lơh jŏ jòng loh làng rlau tai. Củ tịc lơgar đơs sùm, bơt bơtàu mờ lơh sir dà lơgar  gơnoar adat boh lam Xã hội Củ nghĩa Việt Nam là kơnòl broă kah yau, là kơnòl dờng màng ngan mơya kung kơn jơ̆ kơn jŭt ngan mờ gùt Đảng, gùt làng bol he pal bal mờ gơ̆p lơh ngan lơh jat geh cồng nha tàm uă nam tus.

Cau mblàng K’Hạnh