VOV4.K’ho- Di dơ̆ tơngkah kir sơnrai 97 nam Ngai Sră băo Kăc màng Việt Nam, mang ngai 20/06, tàm ƀòn dờng Hồ Chí Minh, kwang đơng lam bồ ƀòn dờng tìp mat ală anih lơh broă sră băo. Tus mờ đơs tàm dơ̆ tìp mat, Củ tịc lơgar ồng Nguyễn Xuân Phúc pơyoa jơnau tus jơh gùt kwang bàng, cau lơh băo, cau sền sơ wì jơnau, cau kŭp lơma ală anih lơh broă sră băo tàm ƀòn dờng Hồ Chí Minh mờ jơh bal cau lơh băo gùt lơgar nùs nhơm rềp mềl mờ jơnau gờm chờ niam bơnĕ ngan rlau jơh.

Củ tịc lơgar ồng Nguyễn Xuân Phúc đơs sùm, bơh ală jơnau cih bơh he dê, sră băo gơ tùi “tơngkah lài gờñ” nàng ală mpồl cau, cau dùl nă să is ờ gơtùi mờ ờ khin lơh tìs, ờ khin sa kwề sa kwà, ờ niam. Ngan là mờ gơnoar broă jat sền, đơs jơnau đơs mpồl bơtiàn dê, sră băo geh pơgồp bơnah bơt bơtàu “Dà lơgar làng bol dê, bơh làng bòl mờ tài làng bol”. Đơs wơl tơngai ƀòn dờng Hồ Chí Minh mờ ală càr, ƀòn dờng tiah đah Jum dà lơgar kong uă bơta hoàc huơr tài bơh kòp Kovid-19, Củ tịc lơgar ồng Nguyễn Xuân Phúc jờng rơ mpồl cau lơh băo neh ờ rơngòt bòl glar, lơh broă ngai mang tàm tiah lam lài rcang sơndră kòp, bơh hơ̆ dong làng bol gùt lơgar gĭt loh bơta kal ke, gĭt loh bơta khin cha, bơta kơ̆ nùs bơh Đảng ƀộ, gơnoar atbồ ală tiah dê sơr lèt gan kòp dờng, hời rơ hời bơtàu tơnguh wơl ală broă lơh lơh sa- mpồl bơtiàn.

Cau mblàng K’Hạnh