VOV4.K’ho- Di Ngai Niam chài ală jơi bơtiàn kòn cau Việt Nam (19/4), drim ngai 19/4, tàm Hìu lơh broă Củ tịc, Củ tịc lơgar ồng Nguyễn Xuân Phúc tìp mat rềp mềr mờ Mpồl cau ala mat tàm hơ̆ geh 92 nă kra ƀòn, kwang atbồ ƀòn, nghệ nhân cau kòn cau dùl ết nă cau pơn rơ jak geh tă pơgồp tàm broă sền gàr, prap gàr, ngui niam bơhiàn niam chài ală jơi bơtiàn kòn cau dê.

Củ tịc lơgar tìp mat đềt mềr kra ƀòn, kwang atbồ ƀòn, nghệ nhân cau kòn cau dùl ết nă cau pơn rơ jak

Đơs tàm dơ̆ tìp mat, ồng Nguyễn Xuân Phúc đơs ngan broă lơh sền gàr, lơh niam rài kis phan bơna mờ nùs nhơm ai làng bol kòn cau ală jơi bơtiàn kòn cau dùl ết nă cau in ngai sơlơ geh sền gròi mờ sơlơ tam gơl niam loh làng, ngan là ală rơndap broă lơh, broă lơh prap gàr mờ ngui niam bơta kwơ niam chài bơh ală jơi bơtiàn kòn cau oh mi dê, sền bơta niam chài ală jơi bơtiàn kòn cau là dùl bơnah ờ gơtùi tam cah is bơh niam chài Việt Nam dê. Củ tịc lơgar kơ̆p kờñ kra ƀòn, kwang atbồ ƀòn, nghệ nhân, cau geh bơngă pin dờn pơn rơ jak pơn jat tai lơh krơh àng ai oh kòn kòn sau mờ mpồl bơtiàn in; là bơta tờm niam ngan tàm ală srơh bơh ală tiah dê, pơn jat tai hòi jà làng bol lơh jat niam bơhiàn niam chài niam bơnĕ, lơh ngan lơh is, tam klăc bal jơi bơtiàn kòn cau. Den tàng jat Củ tịc lơgar, bơh bơta tàm tơrbŏ bal bơh niam chài  dê, geh ƀuơn ngan rềp mềr, gĭt wă mờ kờñ gơboh bal mờ gơ̆p, pơgồp bơnah bơ̆t bơtàu bơta pràn Việt Nam, bơta kwơ Việt Nam ai ngai do mờ ngai tơnơ̆ do in.

Cau mblàng K’Hạnh