Broă lơh “Nam pa sền gàr tiah nhàr dà lơgar – Ram nùs làng bol ƀòn lơgar” geh bơyai lơh pah dơ̆ sa tềp tus, nam pa tus. Broă lơh neh lơh gơlik bơta gơ rề jrô ơnàng, geh ală kâp, ală gah broă, ală mpồl cau mờ cau dồ nă să bơh dà lơgar tus kâp hơ đơm sền gròi, at tê bal, pơgồp bal bơta pràn lòt bal. Đơs tàm dơ̆ bơyai lơh broă lơh, ala mat kwang đơng lam bồ Đảng, Dà lơgar, Củ tịc lơgar Võ Văn Thưởng pơyua jơnau lùp còp đềt mềr, jơnau nting bơr gờm chờ niam bơnĕ ngan rlau jơh tus jơh gùt kwang bàng, cau ling Mpồl ling sền gàr tiah nhàr dà lơgar, làng bol ală jơi bơtiàn tiah nhàr dà lơgar, bồt bơlàu. 

Củ tịc lơgar đơs nền, tiah nhàr dà lơgar ngài kung gam uă kal ke, bòl glar, Mpồl ling sền gàr tiah nhàr dà lơgar neh geh uă broă lơh ngan ngồn, geh kuơ, niam chài gơ gơs mờng kwèng mờ đềt mềr tàm nùs nhơm bơh làng bol tiah nhàr dà lơgar mờ làng bol gùt lơgar dê. Pah nam, pah tŭ nam pa tus, Broă lơh “Nam pa sền gàr tiah nhàr dà lơgar – Ram nùs làng bol ƀòn lơgar” geh lơh duh hồl tàm làm gùt ală tiah nhàr dà lơgar, bồt bơlàu là dùl cơng tàng niam ngan bè nùs nhơm tam klac bal ling klàng làng bol, bè bơta đềt mềr poac mhàm đah ling klàng làng bol mờ làng bol ală jơi bơtiàn.