VOV4.K’ho- Pơn jat tai dơ̆ lơh broă tàm ală càr tiah đah jum dà lơgar, drim ngai 19/01, tàm càr Tiền Giang, Củ tịc lơgar ồng Nguyễn Xuân Phúc tus bal dơ̆ bơyai lơh ai rơndeh lòt rê gơl gùng rơndeh ntoat răt Trung Lương – Mỹ Thuận, drơng broă lòt rê tàm dơ̆ sa tềp bơhiàn Ñâm Zần 2022. Gơl gùng rơndeh ntoat răt Trung Lương – Mỹ Thuận geh kuơ dờng màng ngan tàm broă lòt rê, tơrbŏ bal tiah ring dà dờng Cửu Long mờ ƀòn dờng Hồ Chí Minh mờ ală tiah lơh sa tờm tiah đah jum dà lơgar.

Đơs tàm dơ̆ bơyai lơh, Củ tịc lơgar ồng Nguyễn Xuân Phúc đơs loh, phan bơna gùng lòt là bơta kuơmàng ngan rlau jơh gơ wèt tus mờ tiah ring dà dờng Cửu Long mờ broă rơndap broă lơyài tơngai lam lơh uă nam neh lơh uă cau ờ suk ngan. Den tàng Cíñ phủ neh geh ală broă lơh nền kràñ ngan nàng bơsong kal ke bè priă tă lơh, tơngai lam lơh, cau tờm bơcri priă lơh... Củ tịc lơgar kung đơs niam Tập đoàn Đèo Cả neh đơng lam kràñ cê, lam lơh ngai măng, bơsong ală broă gơlik geh, kờp bal tàm tơngai kòp bơtờp, nàng ai rơndeh lòt rê gơl gùng do.

Cau mblàng K’Duẩn