VOV4.K’ho- Tàm mang ngai 06/04, tàm nùs nhơm jơh gùt lơgar gam wèt tus ngai Duh kah Bơtau Hùng ngai 10/03, ƀòn dờng Cần Thơ bơyai lơh Dơ̆ sơnđờm bơyai lơh ai ngui Hìu duh kah Bơtau Hùng, dùl broă bơ̆t bơtàu niam chài tơngŏ bơhiàn kwơmàng hùc dà kah tô dà bơh jơi bơtiàn dê, nàng kờñ cih kah dà kơlhề bơ̆t bơtàu dà lơgar bơh ală bơtau Hùng dê. Sơnđờm dơ̆ bơyai lơh, tàm Hìu duh khuai tờm bơh Hìu duh kah bơtau Hùng dê, Củ tịc lơgar ồng Nguyễn Xuân Phúc lam bồ mpồl kwang bàng đơng lam bồ, lài do là Kwang bàng đơng lam bồ Đảng, Dà lơgar chu ñàng jơh nùs ki ngàm kun bồ, kah kơlôi, kah rơngal wơl dà kơlhề ală bơtau Hùng dê.

Củ tịc lơgar, Cau tờm dơ̆ bơyai lơh chu ñàng tàm ală jơnăng duh khuai jăt rơndăp tăp sèng Bơtau sơnrờp dà lơgar bơtau Hùng, Bàp sơnrờp dà lơgar Lạc Long Quân, Mè sơnrờp dà lơgar Âu Cơ, Kwang ling sơnrờp dà lơgar dê mờ Kwang bàng lơh broă sơnrờp dà lơgar dê. Cih tàm pang sră lời kir tàm Hìu duh khuai, Củ tịc lơgar ồng Nguyễn Xuân Phúc đơs, tiah do geh gơ gơs là anih bơtòm tơrgùm đah huềng duh khuai ki ngàm ală bơtau Hùng tàm tiah ù tiah đah jum dà lơgar mờ tàm tơrbŏ ndu tàm king crŭ mờ Hìu duh khuai bơtau Hùng tàm tiah đah tô dà lơgar, gơlơh bè dang che tàm tơrbŏ đah Tô- đah Jum dùl hìu, ù tiah dà lơgar dùl sèng, bơtàu tơnguh pas sơm pràn kơldang, khin cha jak chài.

Cau mblàng Lơ Mu K’Yến