VOV4.K’ho- Mho ngai 15/02, di tơngkah kir sơnrai 233 nam tam lơh pha lin Ngọc Hồi- Đống Đa (1789-2022), 92 nam ngai crơng gơs Đảng Kộng sản Việt Nam, càr Bình Định bơyai lơh Dơ̆ sơnđờm ai ngui Hìu duh khuai Tây Sơn Tam Kiệt, broă lơh geh bơta kwơ dờng màng ngan bè jơnau kah yau, niam chài, jak chài, gơ jăt bal mờ muh mat bơh Bơtau Quang Trung dê mờ srơh ntàu tam lơh Tây Sơn, rài bơtau Tây Sơn lồi rài XVIII. Tus bal dơ̆ bơyai lơh geh Củ tịc lơgar ồng Nguyễn Xuân Phúc bal mờ pơ ùr, kwang đơng lam bồ ală ƀộ, gah lơh broă dà lơgar, ală tiah bal mờ uă ngan làng bol càr Bình Định dê.

Đơs tàm dơ̆ bơyai lơh, Củ tịc lơgar đơs 5 jơnau bơsram bơh Quang Trung- Nguyễn Huệ dê, cau Bơtàu tiơng pơnrơ ngan jak chài ngan. Do là ală jơnau bơsram kwơmàng gơwèt mờ broă lơh sền gàr dà lơgar, sền gàr lơngăp lơngai dà lơgar mờ ơn prăp ală bơta kwơ jrô ơnàng bè bơtàu tơnguh lơh sa- mpồl bơtiàn ai càr Bình Định in đơs is mờ jơh gùt lơgar in đơs bal. Di tàm dơ̆ do, Củ tịc lơgar sồr Đảng ƀộ, gơnoar ătbồ bal mờ làng bol càr Bình Định bal mờ Ƀộ Văn hoá, Thể thao mờ Zu lịc, ală anih lơh broă, mpồl lơh broă geh gơrềng pal lam lơh jăt niam mờ geh cồng nha broă lơh dà lơgar sền gàr mờ ngui niam kơ̆ kơl jăp jŏ jòng bơta kwơ Phan lời wơl tiah Hìu duh khuai Tây Sơn Tam Kiệt, gờñ lơh rơndăp broă lơh sền gàr mờ ngui niam kơ̆ kơl jăp jŏ jòng bơta kwơ tiah tềl lời wơl dà lơgar dờng màng do.

Cau mblàng Lơ Mu K’Yến