Củ tịc lơgar ồng Võ Văn Thưởng jờng rơ uă ngan Ală mpồl ala măt Kă bro mờ Lơh sa mờ măy mok lơgar Việt Nam dê neh lơh gơs jơh ală kơnòl broă mờ Đảng, Dà lơgar dê jàu tàm sùm 60 nam do, dong kờl chồl tơnguh ală mpồl lơh sa kă bro mờ cau lơh sa kă bro lơgar Việt Nam dờng pràn.

Tơnơ̆ mờr 40 nam Tam gơl pa, mpồl ală cau lơh sa kă bro, mpồl lơh sa kă bro lơgar he dê neh geh bơta dờng pràn uă ngan bal mờ mờr 1 tơlak mpồl lơh sa kă bro, rlau 5 tơlak hìu bơnhă kă bro is, mờr 30 rbô hợp tak xã. Bal mờ hơ̆, mờr 30 rbô mpồl lơh sa kă bro geh priă bơcri lơgar ndai gam lơh broă tàm Việt Nam, tă pơgồp kwơmàng tàm broă tơnguh uă pràn jak lơh sa, kă bro mờ lơgar ndai, tam gơl rơndăp tăp sèng lơh sa mờ gơguh lơh sa lơgar Việt Nam dê. Củ tịc lơgar đơs nền, Đảng, Dà lơgar sùm sền gròi, dong kờl, ai tơl bơta ai bơta bơtàu tơnguh mờ dờng pràn bơh mpồl ală cau lơh sa kă bro, mpồl lơh sa kă bro lơgar Việt Nam dê. Tàm dơ̆ pơrjum do, Ală mpồl ala măt Kă bro mờ Lơh sa mờ măy mok lơgar Việt Nam tơlik măt Mpồl duh broă Mpồl lơh sa kă bro khà dùl lơgar Việt Nam dê geh 21 nă cau bơh sơnrờp là ala măt ală mpồl lơh sa kă bro lam bồ gah lơh broă do lơgar Việt Nam dê.