VOV4.K’ho- Mang ngai 14/06, càr Quảng Bình bơyai lơh Dơ̆ yal kah dà kơlhề ơn pơdơng Wa Hồ in mờ broă lơh đơs crih tam ya tơngkah kir sơnrai 65 nam Wa Hồ rê còp càr Quảng Bình. Đơs tàm dơ̆ bơyai lơh, Củ tịc lơgar ồng Nguyễn Xuân Phúc đơs loh: Quảng Bình là kơnhoàl ù tiah ndu gơnrơh king crŭ cau jak chài là tiah bơtòm tơrgùm bơta niam ngan rlau jơh uă rài niam chài dờng bơh jơi bơtiàn dê. Pơgăp mờ do 65 nam, ngai 16/06/1957, Wa Hồ neh mŭt còp càr Quảng Bình.

Lài mờ tŭ tus bal dơ̆ bơyai lơh tơngkah kir sơnrai, Củ tịc lơgar ồng Nguyễn Xuân Phúc chu ñàng kah kơlôi Củ tịc Hồ Chí Minh mờ ală Cau ling khin cha jak chài chơ̆t màng

Tàm 65 nam lơh jăt jơnau bơto bơh Wa Hồ dê, ngan là rlau 35 nam lơh jăt gùng dà tam gơl pa, kơnhoàl ù tiah neh geh tŭ kong kơn jơ̆ ngan tài bơh ƀồm mền gar năt tàm rài tam lơh lơh aniai tŭ do neh tam gơl să he bơtàu tơnguh pràn kơldang.Đảng ƀộ, ling klàng mờ làng bol càr Quảng Bình neh tam klăc bal dùl nùs, lơh ngan pơđơl pràn, lơh geh ală cồng nha dờng tàm jơh ală gah broă lơh. Ală cồng nha lơh geh là pal pơñiờ să ngan, lơh geh bơnàng jă kơ̆ kơl jăp ai càr Quảng Bình in bơtàu tơnguh mhar mờ kơ̆ kơl jăp rlau tàm tơngai tus. Tàm dơ̆ bơyai lơh tơngkah kir sơnrai, ală kwang bàng mờ gal ngan ală rơnàng làng bol geh sền dơ̆ lơh đơs crih tam ya “Dan hơ sùm mờ Wa Hồ brồ guh sùm”.

Cau mblàng Lơ Mu K’Yến