VOV4.K’ho- Di tơngkah kir sơnrai 68 nam tam lơh pha lin Điện Biên Phủ (07/5), ngai 18/5, tàm ƀòn dờng Điện Biên Phủ, càr Điện Biên, Củ tịc lơgar ồng Nguyễn Xuân Phúc tus bal mờ lam lơh bơhiàn ai ngui Hìu duh khoai cau ling chơt màng tàm tiah tam lơh Điện Biên Phủ mờ lam lơh broă lơh hìu ơm nùs nhơm, gàr ờdo ờdă rài kis mpồl bơtiàn.

Củ tịc lơgar ồng Nguyễn Xuân Phúc đơs tàm dơ̆ bơyai lơh

Đơs tàm dơ̆ bơyai lơh, Củ tịc lơgar ồng Nguyễn Xuân Phúc jơh nùs ki ngàm kah kơlôi mờ ai tơnggŏ nùs nhơm kah ưn ngài uă ngan tus Củ tịc Hồ Chí Minh kờñ gơboh; kah kơlôi Đại tướng Võ Nguyễn Giáp, mờ kung sùm cih kah dà kơl hề dờng màng bơh ală kwang đơng lam ling klàng, kwang bàng, cau ling, ơruh pơnu lam lài, làng bol lơh gùng mờ jun phan tiah tam lơh in, ling klàng mờ làng bol gùt lơgar neh khin cha jak chài tam lơh, phi să, lơh gơs pha lin Điện Biên Phủ dờng màng.

Đơs nền Đảng, dà lơgar sùm sền gròi, đơng lam lơh jat niam srơh Kis git jơnau git adat, Hùc dà kah tô dà mờ ală kơ cế, broă lơh, Củ tịc lơgar đơs là, Broă lơh hìu duh khoai cau ling chơt màng nàng bơ tòm tơrgùm huềng ală cau ling khin cha jak chài chơt màng dê tàm ù tiah Điện Biên, geh là anih lam lơh ală bơhiàn gah huềng, kah ưn ngài dà kơl hề ală cau neh phi să, tă pơgồp rài kis he dê ai dà lơgar in.

Cau mblàng K’Duẩn