VOV4.K’ho- Drim ngai 07/02, tàm Hà Nam, Củ tịc lơgar ồng Nguyễn Xuân Phúc tus bal dơ̆ sơn đờm lam lơh rơndap broă lơh bơnah dơ̆ 2 (gam hòi là tơngai dơ̆ 2) gơ wèt rơndap broă lơh bơcri priă lơh gơl gùng ù gờl tơrbŏ bal gùng rơndeh ntoat răt Hà Nội- Hải Phòng mờ gùng rơndeh ntoat răt Cầu Giẽ- Ninh Bình. Rơndap broă lơh bơnah dơ̆ 2 (gam hòi là tơngai dơ̆ 2) geh priă tă lơh kờp jơh 702 tơmàn 820 tơlak đông, jòng 16,3 kơi sồ bơh Sở Giao thông Vận tải càr Hà Nam lơh cau tờm bơcri priă, cau tờm lơh là mpồl lơh sa kă bro bơt bơtàu Xuân Trường. Tơngai lơh gơs rơndap broă là nam 2023.

Đơs tàm dơ̆ sơn đờm lam lơh, Củ tịc lơgar ồng Nguyễn Xuân Phúc đơs nền bơta kuơmàng bơh gơl gùng rơndeh ntoăt răt tàm tơrbŏ bal do dê, ờ mìng dong tơrmù ƀà khà rơndeh rơndồ ai tiah dơlam ƀòn dờng Hà Nội in mờ gam tơnguh cồng nha tàm tơrbŏ bal gùng lòt, gơ hòi gơ jà bơcri priă mờ rề ơnàng ù tiah bơtàu tơnguh kă bro, nhơl chờ, tiah drà bơh tiah ring đah tô dà lơgar dê. Củ tịc lơgar sồr Ƀộ Giao thông Vận tải, càr Hà Nam, cau tờm bơcri priă, ală cau tờm lơh pal git tơl làm kơnòl broă gơ wèt tus mờ rơndap broă, lơh di tŭ tơngai hơ pơrgon, gàr bơta niam mờ cồng nha broă lơh, rơcang sơndră bơta ờ niam, sa kuề sa kuà tàm broă bơcri priă, bơt bơtàu kuơmàng.

Cau mblàng K’Duẩn