VOV4.K’ho- Mho mang ngai 26/08, Củ tịc lơgar ồng Nguyễn Xuân Phúc neh tus bal Ngai chờ lòt bơsram bơh Hìu bơsram Kâp dùl, Kâp bàr mờ Kâp pe Hy Vọng, là hìu bơsram ròng gàr mờ bơto bơtê ală oh dềt ờ bơtuah chơ̆t mè bèp tài bơh kòp Kovid-19 tàm Đà Nẵng. Tàm ngai chờ, Củ tịc lơgar ồng Nguyễn Xuân Phúc jờng rơ ală kơnòm bơsram Hìu bơsram Hy Vọng bulah pa mŭt bơsram mơya neh sơrlèt gan bơta ƀàs sìl nàng gơrờm bal mờ ală pơgru bơyai lơh ngai chờ lòt bơsram bềng bơta kwơ mờ ngoh rơngac ngan.

Củ tịc lơgar đơs sùm mờ bơhiàn bơh yau bơh he dê, dà lơgar Việt Nam neh cih gơs jơnau đơs crih jờng rơ bơta khin cha jak chài bè pràn kis Việt Nam, bè nùs nhơm sơrlèt gan kal ke brồ guh là tềl kah bè bơta sơnđờm pa ai dùl rài tơnơ̆ do àng sơrdah bal mờ uă bơta niam bơnĕ àng sơrdah ngan. Củ tịc lơgar pin dờn mờ bơta nđàc mờ bơta sền gròi bơh mpồl bơtiàn dê, ală oh geh iang nùs bơsram sră nàng tă pơgồp bơ̆t bơtàu ƀòn lơgar, dà lơgar mờ kơ̆p kờñ ală kơnòm bơsram gơtìp kòn đời mè bèp tàm tơngai bơtờp kòp Kovid-19 pal jơh nùs tĕ bơsram sră, bơsram tàp nàng gơ gơs là cau geh kwơ ai mpồl bơtiàn in.

Cau mblàng Lơ Mu K’Yến