VOV4.K’ho- Drim ngai 23/9, tàm ƀòn dờng Đà Nẵng, Thàñ ủy Đà Nẵng pơgồp bal mờ Viện kah yau ling klàng, gah đơng lam Quân khu 5 bơyai lơh Pơrjum jak chài mờ tơngume “70 nam pha lin Đồn Nhất- Hải Vân Quan- Tềl kah yau, mờng chài bè bơt bơtàu mpồl tam lơh làng bol”.

Tàm kah yau dà lơgar, pha lin Đồn Nhất- Hải Vân Quan neh lời wơl uă mờng chài mờ jơnau bơsram kuơmàng ngan ai mpồl ling Liên khu 5 in tàm jơh gùt tŭ tơngai tam lơh dră wơl bol sò tơm Tây mờ bol sò tơm Mỹ sơ gràm phà ù tiah dà lơgar. Pha lin do là rùp ai lơh pơn yơu niam ngan ai niam chài tam lơh pôs ling bơh ling klàng mờ làng bol tiah 5 dê, lơh gơlik dùl bơta chài tam lơh pa tàm bơta ù tiah brê bơnơm kal ke, anih ơm pồn bơh bol sò tơm dê kơ̆ kơljap bal mờ phàu crong pràn; pha lin Đồn Nhất neh ai gŏ bơta pơgồp bal chài ngan đah broă lơh ling klàng mờ broă lơh cíñ trị, đah pơgồp bal tam lơh bơh mpồl ling tờm ngan dê pơgồp bal mờ bơta pràn bơh làng bol dê mờ bơtàu tơnguh tam lơh tàm ƀòn lơgar. Pơrjum là tŭ nàng sền wơl ală jơnau bơsram kuơmàng tàm 2 dơ̆ tam lơh jŏ jòng bơh jơi bơtiàn dê, ai tai ală cơng tàng jak chài, lơh loh rlau tai bơta kuơ bơh niam chài tam lơh làng bol dê tàm broă lơh sền gàr dà lơgar.

Cau mblàng K’Duẩn