Drim ngai 18/04, Củ tịc lơgar Việt Nam ồng Võ Văn Thưởng jàu Kơrnoăt pồ ồng Phạm Quang Hiệu, Thứ trưởng Ƀộ Ngoại giao, Kwang ătbồ Ủy ƀan Dà lơgar bè cau Việt Nam tàm lơgar ndai lơh Đại sứ ala măt lơgar Kộng hoà Xã hội Củ nghĩa Việt Nam tàm lơgar Nhờk mơkung ăt tai kơnòl broă Kộng hoà Bồt Marshall, tơngai lơh broă bơh nam 2023- 2026.

Đơs tàm dơ̆ bơyai lơh, Đại sứ ồng Phạm Quang Hiệu hơ tàm tơngai lơh kơnòl broă bơh he dê rơ̆p lơh ngan tă pơgồp bơ̆t bơtàu bơta gĭt gơ̆p bàr lơgar bơtàu tơnguh pràn kơldang: sơlơ tàm pơgơl tai mpồl kwang bàng lòt còp bal mờ gơ̆p, ai tơl bơta ƀươn drơng làng bol mờ mpồl lơh sa kă bro bàr lơgar in, pơgồp bơnah chồl tơnguh cribơyai broă mờ lơgar ndai lơh sa. Đại sứ rơ̆p bal mờ kwang bàng, cau lơh broă tàm Đại sứ quán chồl tơnguh gah broă lơh broă bal bơtàu tơnguh, bơcri priă lơh phan bơna, bơtàu tơnguh măy mok pa, sơlơ tam gơl tai sồ, tam gơl tơlir; sơlơ tơnguh broă lòt rê lơh kwèng bal đah làng bol, gĭt gơ̆p lơh broă bal đah ală tiah bơh 2 lơgar dê; lơh pràn broă lơh kơlôi sơnơng tă pơgồp jơnau đơs, bơ̆t bơtàu Đảng, lơh pràn kơldang tam klăc bal tàm dơlam is mpồl nàng lơh sir niam kơnòl broă geh jàu.