Củ tịc lơgar Võ Văn Thưởng neh tus chu nàng, kah kơlôi ƀồc ồng Trường Chinh, Kwang đơng lam neh geh 3 dơ̆ at gơnoar broă Tổng Ƀí thư Đảng mờ là Củ tịc Hội đồng Dà lơgar bơh nam 1981 tus 1987. Dà lơgar neh geh ală cồng nha bè tŭ do, neh ai tơngŏ nùs nhơm di pal bơh broă tam gơl pa mờ ƀồc ồng Trường Chinh là cau ai jơnau đơs mờ lam lơh. Củ tịc lơgar Võ Văn Thưởng kung neh tus chu ñàng kah kơlôi Đại tướng Trần Đại Quang, Củ tịc lơgar bơh nam 2016 tus 2018. Là cau lam bồt Dà lơgar, Củ tịc lơgar Trần Đại Quang neh lời wơl ală bơta niam bơnĕ ngan tàm nùs nhơm gơ̆p bơyô dunia, pơgồp bal tàm broă tơnguh bơngă, nùs nhơm pin dờn bơh dà lơgar dê.

Di tàm nam pa, Củ tịc lơgar Võ Văn Thưởng neh tus còp Củ tịc lơgar lài do Trần Đức Lương mờ Củ tịc lơgar lài do Nguyễn Xuân Phúc. Củ tịc lơgar Võ Văn Thưởng chờ gờm ală kwang đơng lam lài do bal mờ hìu nhă pràn kơl dang, gơboh gơbài, kis jŏ, pơn jăt tai ai geh bơta pràn, bơta ngăc ngar bal mờ boă mờng chài nàng pơgồp bal uă rơlao tai ai broă bơtàu tơnguh dà lơgar in.