Tàm Hìu sơnơm kơnhoàl Thanh Liêm, Củ tịc lơgar neh còp broă lơh wă cau kòp lòt kham mờ sơm kòp is ngui sră kan kươk làng bol ala mờ sră Bảo hiểm Y tế, dùl broă lơh cèng wơl uă bơta kwơ ai cau kòp in, ngan là tơrmù uă ngan tŭ tơngai lơh broă ai jơh bal ƀák sĩ mờ cau kòp in. Di dơ̆ tơngkah kir sơnrai Ngai Cau lơh sơnơm Việt Nam, ala mat Kwang đơng lam bồ Đảng, Dà lơgar, Củ tịc lơgar Võ Văn Thưởng pơyoa jơnau gờm chờ niam bơnĕ ngan rlau jơh, bơta sền dờng màng ngan, nùs nhơm kờñ gơboh uă ngan tus mờ ală cau lơh sơnơm, kwang bàng, cau lơh broă tàm Hìu sơnơm Thanh Liêm mờ càr Hà Nam dê.

Củ tịc lơgar jờng rơ uă ngan bơh kơnă Hìu sơnơm xã rlau hơđang bơh kơnhoàl dê neh lơh jat niam ngan ală broă lơh jơnau kờñ Dà lơgar bè gah lơh sơnơm kấp hơđơm, cĭt vaccine rcang sơndră kòp, sền gròi pràn kơl dang să jan bơh sơnrờp, bơto pơlam pràn kơl dang ai kơnòm pa tàu in, kham sac rơwah ală cau kòp gơbàn kòp jŏ tơngai. Củ tịc lơgar đơs là, dilah gah lơh sơnơm ƀòn lơgar lơh broă geh cồng nha rơ̆p pơgồp bơnah bơt bơtàu dùl rài tơnơ̆ do kơ̆ kơl jăp ai tiah do mờ Dà lơgar in. Củ tịc lơgar sồr ală kấp ủy, gơnoar atbồ mờ anih lơh broă geh gơrềng bơh càr Hà Nam dê, kơnhoàl Thanh Liêm pơn jat tai sền gròi nàng bơcri priă lơh uă rlau tai ai gah lơh sơnơm ƀòn lơgar in jat gùng dà tơrgùm bơcri priă lơh bơtàu tơnguh mpồl cau lơh broă, bơh hơ̆ tơnguh uă bơta niam kham sơm kòp tàm hìu sơnơm kấp hơđơm in; pơn jat tai bơcri priă blơi phan bơna, măi mok gah lơh sơnơm, bơt bơtàu hìu sơnơm ngăc ngar, rềp mềr, tơlir, sàng goh mờ niam bơnĕ.