Tàm dơ̆ nting bơr gờm chờ sa tềp, Củ tịc lơgar đơs sùm, Ƀộ Tư lệñ Kảñ sát Cơ động pal lơh niam broă lơh bơt bơtàu Đảng sàng goh ngan, kơ̆ kơl jăp ngan, lơh jat niam 6 bơta Wa Hồ dê bơto Kwang àng làng bol, nàng tơl nă kwang bàng, cau ling ngan ngồn là cau lơh krơh niam lam lài, là rùp rài bơh cau kwang àng làng bol tài Dà lơgar hŭi să tờm, tài làng bol mờ drơng broă; ai bơta chờ hờp, chờ hờn mờ bơta lơngăp lơngai bơh làng bol dê lơh bơta chờ hờp bơh să tờm he dê.

Đơs loh, ngai sa tềp bơtòm tơrgùm hìu bơnhă, mơya uă cau ling Kảñ sát Cơ động pal lơh jat kơnòl broă ơm lơh broă, ơm gak, rcang tam dră wơl mờ tơl bơta gơlik geh, Củ tịc lơgar sồr Đảng ủy, Ƀộ Tư lệñ Kảñ sát Cơ động, kwang bàng đơng lam sền gròi, dong kờl rài kis nùs nhơm, phan bơna nàng tơl nă cau ling in bulah ơm lơh broă, lơh kơnòl broă tàm tiah lơi kung gĭt nền geh bơta ram mhŭ bơh ngai nam pa dê, tàm bơta sền gròi bơh kwang bàng, kwang đơng lam bồ mờ cau atbồ dê.