Tàm dơ̆ pơrjum, bàr nă kwang đơng lam bồ jờng rơ ngan bơta bơtàu tơnguh bơh gĭt gơ̆p 2 gah dê tàm tơngai lài, kwơmàng tơnơ̆ tŭ tơnguh kâp gơgơs gĭt gơ̆p Tam klăc lơh broă bal jŏ jòng nam 2015. Gĭt gơ̆p cíñ trị, cribơyai broă mờ lơgar ndai ngai sơlơh geh lơh pràn kơldang bơh gàr sùm ală dơ̆ tìp măt, tàm pơgơl mpồl kwang bàng kâp dờng mờ ală kâp lòt còp bal mờ gơ̆p; ală mpồl lơh broă bal đah 2 gah geh lam lơh dồ bă geh cồng nha.

Bè pơlam gùng bơtàu tơnguh gĭt gơ̆p 2 lơgar tàm tơngai tus, bàr nă kwang bàng đơng lam bồ dồ nùs bal sơlơ tơnguh rlau tai lơh broă bal cíñ trị, cribơyai broă mờ lơgar ndai bơh sơlơ tơnguh tai tàm pơgơl dơ̆ lòt còp mờ tìp măt kwang bàng kâp dờng mờ ală kâp dê; pơgồp bal bơ̆t bơtàu Broă lơh broă lam lơh jăt gĭt gơ̆p Tam klăc lơh broă bal jŏ jòng tơngai bơh nam 2025- 2030. Bè broă dà lềng đah mat tơngai lik, bàr gah hơ gàr sùm mờ lơh geh bơta ring lơngai, lơngăp lơngai, kơ̆ kơl jăp mờ niam, khăt gơboh lòt rê tàm gùng dà lềng mờ gùng rơndeh par; hòi jà ală gah ơ̆t ơl, bañ pơhìn ngui ling klàng halà ngui phan tam lơh, ki ngàm jơh ală broă lơh cribơyai broă mờ lơgar ndai, adat boh lam, bơsong tam pìt tam phà bơh broă lơh ring lơngai, jăt tàm ală bơta pal jăt tờm ngan bơh adat boh lam dunia dê, tàm hơ̆ geh Kông ươk Adat Dà lềng nam 1982 (UNCLOS).