Mờr 400 nă cau dùl nă să geh pà sră jờng rơ Nghệ sĩ Ñân zân, Nghệ sĩ Ưu tú, gơwèt uă gah bè đơs crih tam ya, lơma, tam ya, gah pờ tơlik jơnau đơs- gah sơñio rùp, lơh lèo. Củ tịc lơgar Võ Văn Thưởng tus bal, đơs mờ jàu sră jờng rơ Nghệ sĩ Ñân zân ai ală Nghệ sĩ in.

Đơs tàm dơ̆ jàu sră jờng rơ, Củ tịc lơgar Võ Văn Thưởng ala mat Kwang đơng lam bồ Đảng, Dà lơgar pơyoa jơnau gờm chờ niam bơnĕ ngan rlau jơh tus mờ nghệ sĩ geh jàu pà sră jờng rơ dơ̆ do, ală cau neh lơh broă jơh nùs, bơceh lơh mờ geh uă tă pơgồp pơn rơ ngan ai rài kis niam chài đơs crih tam ya dà lơgar he dê.

Củ tịc lơgar tơngŏ bơta pin dờn, ală rơnàng nghệ sĩ tàm pơrdờn bal pràn kơl dang mờ bơta pràn jak bơceh lơh li la uă ngan mờ nùs nhơm kờñ gơboh Dà lơgar bềng lìu, đềt mềr jrô ơnàng làm uă mờ làng bol, mờ broă lơh tam gơl pa bơh Đảng đơng lam, mpồl Nghệ sĩ lơgar he dê rơ̆p bơceh lơh uă jơnau cih niam, geh bơta kwơ uă bè bồ tơngoh mờ bơta chài, cèng gơnoar broă tàm rài pa, lơh geh bơnàng jă ai nùs nhơm mpồl bơtiàn in, tă pơgồp dờng màng rlau tai tàm gùng lòt tus đah đap bơh jơi bơtiàn dê.