Gờm chờ ală Đại sứ dờp kơnòl broă tàm lơgar Việt Nam, Củ tịc lơgar đơs sùm, mờ bơta mờng chài lơh broă, nùs nhơm lời ai dà lơgar, kòn bơnus lơgar Việt Nam in, bơta dong kờl bơh ală anih lơh broă geh gơnoar lơgar Việt Nam, ală Đại sứ rơ̆p lơh sir kơnòl broă tàm tơngai lơh broă. Wă Đại sứ lơgar Các Tiểu vương quốc Ả-rập Thống nhất (UAE), Củ tịc lơgar ồng Võ Văn Thưởng đơs là, 2 lơgar pal geh broă lơh gờñ ai priă lơh geh bơh tăc phan mờ lơgar ndai đah 2 lơgar dê lơh geh 10 tơmàn dolar Mỹ. Bàr gah kung pal sơlơ tơnguh bơta gĭt gơ̆p cíñ trị, lơh broă mờ lơgar ndai.

Wă Đại sứ lơgar Sri Lanka ồng Sajeewa Umanga Mendis, Củ tịc lơgar ồng  Võ Văn Thưởng đơs nền, lơgar Việt Nam sùm sền dờng màng bơtàu tơnguh bơta gĭt gơ̆p lơh bơyô bal bơh yau mờ lơh broă bal uă gah mờ lơgar Sri Lanka. Bàr gah kung pal sơlơ tơnguh lơh broă bal bè kă bro, bơcri priă, tam pà bal bơta mờng chài tàm broă tơn jơh jơgloh tơrmù rƀah, bơtàu tơnguh kòn bơnus, bơto bơtê, gah lơh sơnơm, bơta niam chài.

Wă Đại sứ lơgar Chile, Củ tịc lơgar ồng Võ Văn Thưởng chờ hờp sền gŏ bơta gĭt gơ̆p đah Việt Nam mờ Chile sùm geh bơt bơtàu, 2 lơgar digơlan sơlơ tơnguh lơh broă bal nàng bơtàu tơnguh bơta gĭt gơ̆p tàm tơngai tus.