Đơs tàm dơ̆ wă rò, ala măt kwang bàng đơng lam bồ Đảng, Dà lơgar mờ làng bol Việt Nam, Củ tịc lơgar jơh nùs ưn ngài ală nùs nhơm niam bơnĕ, bơta tam klăc, tàm dong kờl bal kwơmàng ngan mờ ală gơ̆p bơyô dunia neh mờ gam lời ai Việt Nam in mờ tơlik nùs nhơm tơngŏ bơta pin dờn ală bơyô dunia rơ̆p sùm sùm lòt bal mờ làng bol Việt Nam tàm broă lơh bơ̆t bơtàu mờ sền gàr Dà lơgar ngai do. Củ tịc lơgar đơs nền, Đảng, Dà lơgar mờ làng bol Việt Nam sùm cih kah bơta tàm dong kờl bal kwơmàng ngan bơh gơ̆p bơyô dunia dê, ờ gŏ tam cah jơi bơtiàn, kơltau, bơta jăt yàng, sùm ơm rềp bal mờ Việt Nam tàm ală nam nhai tam lơh bòl glar kal ke ngan rlau jơh. Bơta dong kờl, bơta kờñ gơboh bal kwơmàng ngan hơ̆ neh gơ gơs dùl bơnah bơh jơnau kah yau tam lơh mờ bol sò tơm sơgràm phà dà lơgar bơh làng bol Việt Nam he dê tài bơta lơngăp lơngai is, khăt gơboh is bơh Dà lơgar dê, kung bè tài bơta ring lơngai, jơnau dipal mờ jơnau song tàm dunia.