VOV4.K’ho- Mho ngai 30/08, tàm Hìu duh broă Củ tịc, Củ tịc lơgar ồng Nguyễn Xuân Phúc neh wă rò ală mpồl năc dunia tus bal Pơrjum dờng Mpồl Cữ thập đỏ Việt Nam, bơh ồng Jagannath Chapagain, Kwang ătbồ Mpồl cau gơnoar cih Tơrgùm ală Mpồl Cữ thập đỏ mờ Àng kơnhai sề mơ̆ pơrhê dunia lam bồ. Củ tịc lơgar ồng Nguyễn Xuân Phúc jờng rơ ồng Jagannath Chapagain mờ ală kwang bàng dunia tus bal Pơrjum dờng dơ̆ XI Mpồl Cữ thập đỏ Việt Nam.

Củ tịc lơgar ồng Nguyễn Xuân Phúc tìp măt mờ ală kwang bàng dunia lòt Pơrjum dờng Mpồl Cữ thập đỏ Việt Nam dơ̆ XI

Củ tịc lơgar jờng rơ ngan Tơrgùm ală Mpồl Chữ thập đỏ mờ Àng kơnhai sề mơ̆ pơrhê dunia, Ủy ƀan Chữ thập đỏ dunia mờ ală cau lơh broă bal dunia neh dong kờl jơh nùs mờ geh cồng nha ngan gơwèt mờ Mpồl Cữ thập đỏ Việt Nam mờ làng bol Việt Nam, ngan là gơwèt mờ ală cau ƀươn gơtìp gơrềng aniai, cau gơtìp aniai tài bơh rài tam lơh, cau gơtìp aniai tài bơh trồ tiah, kòp bơtờp tàm tơngai pa do.

Củ tịc lơgar ồng Nguyễn Xuân Phúc pà gĭt, Việt Nam kong gơrềng kơn jơ̆ ngan bơh tam gơl trồ tiah dê, den tàng kơ̆p kờñ Tơrgùm ală Mpồl Cữ thập đỏ mờ ală cau lơh broă bal dunia dong kờl ờ tơm wơl ală broă lơh, rơndăp broă lơh tàm gah broă do, nàng kờñ dong làng bol tơrmù ƀà aniai hoàc hươr mơkung lơh jăt jơnau kờñ sền gàr tiah ơm kis, tơrmù ƀà sồ siă đù tuh sang bơdìh...

Cau mblàng Lơ Mu K’Yến