VOV4.K’ho- Mho ngai 11/02, tàm Gơlăng Củ tịc, Củ tịc lơgar ồng Nguyễn Xuân Phúc neh wă rò Đại sứ lơgar Mỹ mờ Đại sứ lơgar Mehico jun sră dà lơgar pơyua.

Wă rò Đại sứ Mỹ, ồng Marc Evans Knapper jun sră dà lơgar pơyua, Củ tịc lơgar ồng Nguyễn Xuân Phúc gờm chờ Đại sứ neh geh Kwang ătbồ lơgar Mỹ ồng Joe Biden jàu kơnòl broă kơn jơ̆ ngan pa mờ gờm chờ Đại sứ tus wơl mờ Hà Nội. Củ tịc lơgar jờng rơ ngan Đại sứ Mỹ tàm ală tŭ lơh broă tàm Đại sứ quán Mỹ tàm Việt Nam tàm tơngai lơh broă bơh nam 2004- 2007 neh pơgồp bơnah kwơmàng dong tơnguh bơta gĭt gơ̆p đah 2 lơgar. Củ tịc lơgar pin dờn tàm tơngai lơh broă tàm lơgar Việt Nam, Đại sứ Mỹ geh lơh ngan tă pơgồp uă rlau tai tàm broă dong lơh tơnguh bơta gĭt gơ̆p Việt Nam mờ Mỹ.

Củ tịc lơgar ồng Nguyễn Xuân Phúc wă rò Đại sứ Mỹ, ồng Marc Evans Knapper

Wă rò Đại sứ lơgar Mehico jun sră dà lơgar pơyua, Củ tịc lơgar gờm chờ ồng Alejandro Negrin Monoz neh geh pồ lơh Đại sứ lơgar Mehico tàm Việt Nam mơkung pin dờn Đại sứ mờ bơta mờng chài uă ngan tàm gah cribơyai broă mờ lơgar ndai geh lơh sir gơs jak ngan tơngai lơh broă, tă pơgồp bơtàu tơnguh bơta gĭt gơ̆p lơh bơyô bal ờs mờng bơh yau mờ lơh broă bal uă gah đah 2 lơgar.

Cau mblàng Lơ Mu K’Yến