VOV4.K’ho- Di sa tềp bơhiàn Chol Chnam Thmay nam 2022, ala mat Ủy ƀan Mặt trận dà lơgar Việt Nam, Ƀí thư Đảng dà lơgar, Củ tịc Ủy ƀan Mặt trận dà lơgar Việt Nam ồng Đỗ Văn Chiến neh pơyua sră nting bơr gờm chờ tus ală cau kơ đơng yàng phờk, cau jat yàng phờk mờ làng bol kòn cau Khmer. Tàm sră pơyua, ồng Đỗ Văn Chiến pơyua tus ală cau kơđơng yàng, cau jat yàng phờk mờ làng bol kòn cau Khmer tàm làm gùt ù tiah dà lơgar jơnau lùp còp jơh nùs, jơnau nting bơr gờm chờ 1 nam pa pràn kơldang, bơtuah bơtuài, tơl bơta niam bơnĕ.

Gờm chờ sa tềp Chol Chnam Thmay nam 2022, ồng Đỗ Văn Chiến kơp kờñ ală cau kơ đơng yàng, cau jat yàng Phờk mờ làng bol kòn cau Khmer pơn jat tai tơnguh bơhiàn niam bơnĕ bơh jơi bơtiàn kòn cau dê, tam klac bal dùl nùs bal mờ gùt Đảng, gùt làng bol, gùt ling klàng chồl pràn ală srơh tàm pơrlòng kờñ gơboh dà lơgar, lơh ngan lam lơh jat geh cồng nha ală jơnau kờñ bơtàu tơnguh lơh sa, mpồl bơtiàn neh geh dà lơgar, kấp hơ đơm ai tơlik; sền gròi lam lơh niam ală broă lơh rơcang sơndră kòp bơ tờp, sền gàr pràn kơldang să jan, màng kis bơh tơl nă làng bol dê; dùl nùs bal, pơgồp bal bơta pràn lam lơh geh cồng nha ală broă lơh dong kờl kòn cau bơh Đảng mờ dà lơgar dê, ngan là rơndap broă mờ broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030; bal mờ hơ̆ pal lơh ngan sền gàr, tơnguh niam chài niam bơnĕ kòn cau Khmer dê, li la ring bal tàm rài niam chài Việt Nam bềng lìu bơta niam chài rơgơi jơi bơtiàn.

Cau mblàng K’Duẩn