Tàm jơnau yal bơh Cíñ phủ pơyoa Anih duh broă Lơh kơnòl broă sùm Quốk hội in sền wơl 02 tơngu me: Tam pà Priă bơcri dà lơgar di mơ tơngai bơh nam 2021 tus 2025 là 22 rơbô 551 tơmàn đong priă rơcang bal Broă rơndăp bơcri priă dà lơgar di mơ tơngai bơh priă gơguh tă tàm kes priă Dà lơgar nam 2022 ai 11 rơndăp broă lơh; tam pà broă rơndăp bơcri priă dà lơgar nam 2024 là rơlao 2 rơbô 100 tơmàn đong bơh priă gơguh priă tă tàm kes priă Dà lơgar nam 2022.

Củ tịc Quốk hội ồng Trần Thanh Mẫn đơs là, tus tŭ do, kung gam uă rơndăp broă lơh, broă lơh gơtìp lơyài, geh tŭ ờ hềt geh tam pà priă. Den tàng, Củ tịc Quốk hội sồr, Cíñ phủ sồr ală ƀộ, gah lơh broă dà lơgar mhar sền wơl, lơh loh tài bơta lơi, lam sồr tàm tơngai lơh, lơh gơs ală sră nggal bơcri priă tam pà. Củ tịc Quốk hội kung sồr tơnkah, broă atbồ, ngui priă bơcri dà lơgar pal tềm pềr, geh cồng nha, bañ lời gơtìp ală broă lơh, rơndăp broă lơh lơi roh rui, hoàc huơr, ai geh nùs nhơm pin dờn tàm Đảng, tàm làng bol; bơdìh hơ̆ tai pal jăt sền nền nòn ală rơndăp broă lơh, broă lơh geh Quốk hội kĭ ai lơh.