VOV4.K’ho- Drim ngai 09/02, Củ tịc Quôk hội ồng Vương Đình Huệ neh lòt còp, gờm chờ sa tềp mờ kờp sền wơl bàr pe broă lơh bè sền swì tơn jơh nam 2021, gùng dà nam 2022; broă lam lơh jăt Cỉ thị sồ 11 bơh Ƀan Ƀí thư dê bè broă bơyai lơh Sa tềp nam Ñâm Zần 2022 tàm ƀòn dờng Hải Phòng.

Ala mat kwang bàng đơng lam bồ Đảng, Dà lơgar, Quôk hội, Ủy ƀan Thường vụ Quôk hội, Củ tịc Quôk hội ồng Vương Đình Huệ cih dờp, jờng rơ mờ đơs niam ngan ală cồng nha mờ Đảng ƀộ, gơnoar ătbồ bal mờ làng bol ƀòn dờng Hải Phòng neh lơh geh tàm tơngai lài. Đơs sùm ală gùng dà, kơnòl broă nam 2022 bơh ƀòn dờng Hải Phòng dê tơl làm ngan, Củ tịc Quôk hội ồng Vương Đình Huệ sồr, đòm jăt ală cồng nha neh lơh geh tàm nam 2021, nam 2022, Hải Phòng pal pơn jăt tai đơng lam, sồr lơh jăt niam geh cồng nha Kơrnoăt, Cỉ thị, Jơnau đơs pơndŭt bơh Dà lơgar dê, Kơrnoăt Đảng dê, Kơrnoăt bơh Quôk hội dê, Cíñ phủ dê bè jơnau kờñ bơtàu tơnguh lơh sa- mpồl bơtiàn nam 2022 jăt nùs nhơm sơrbac mhar, kràñ cê jơh nùs tơn tơnơ̆ dơ̆ ơm rlô sa tềp.

Cau mblàng Lơ Mu K’Yến