VOV4.K’ho- Mho ngai 25/07, tàm càr Quảng Ngãi, Củ tịc Quôk hội ồng Vương Đình Huệ còp mờ lơh broă tàm Kông ty Kổ phần Jồr gơs zờu Bình Sơn. Đơs tàm dơ̆ lơh broă, Củ tịc Quôk hội ồng Vương Đình Huệ đơs sùm, tơnguh uă khà lơh niam wơl; tơnguh uă bơta pràn jak mờ sơlơ tơnguh ngui ală broă lơh khoa học mờ kông nghệ nàng pơgồp bơnah tơnguh uă cồng nha lơh broă, khà ờdo ờdă, bơta niam phan bơna, tơrmù priă tă lơh gơlik, gàr niam rài kis ai kwang bàng, kông ñân viên cứk in.

Củ tịc Quôk hội kung jờng rơ uă ngan gơnoar broă bơh Tập đoàn Nhơm zờu Việt Nam (PVN) dê, tơngai tus, sồr Tập đoàn Nhơm zờu Việt Nam: tơrgùm bơta pràn nàng lơh sir jơnau kờñ broă lơh jŏ jòng bơtàu tơnguh gah Nhơm zờu Việt Nam mờ Tập đoàn Nhơm zờu Việt Nam tus nam 2025, bơta wèt sền tus nam 2035; lam lơh dùl ròt rơndap broă lơh rơndap tap sèng wơl mpồl lơh sa kă bro bơh Tập đoàn Nhơm zờu Việt Nam dê, lơh jat niam geh cồng nha bơta pràn neh geh bơcri priă kung bè lơh gơs niam tiah ơm kis, bơtàu tơnguh ală priă lơh geh bơh nhơm zờu dê nàng kờñ tơnguh bơta pràn tàm pơrlòng hời rơ hời đơs nền bơngă bơh PretroVietnam dê tàm anih lơh broă dunia.

Cau mblàng K’Hạnh