VOV4.K’ho- Mho ngai 22/08, tàm Hìu lơh broă Quôk hội, Củ tịc Quôk hội ồng Vương Đình Huệ neh tus bal dơ̆ lơh broă đah Mpồl jat sền bơh Quôk hội dê mờ Ủy ƀan Ñân zân ƀòn dờng Hà Nội bè lơh jat broă tềm pềr, sơndră pơhì pơhà.

Anih lơh broă bơh Củ tịc Quôk hội mờ Ủy ƀan Ñân zân ƀòn dờng Hà Nội

Jơnau yal bơh Ủy ƀan Ñân zân ƀòn dờng Hà Nội dê đơs sùm, broă lơh jat tềm pềr, sơndră pơhì pơhà sùm geh sền gròi, đơng lam, sồr lơh nền nòn ngan mờ sền gĭt là kơnòl broă tờm bơh ƀòn dờng dê. Pal đơs ngan là tàm tơngai bơh nam 2016-2021, ƀòn dờng neh tềm pềr geh mờr 42 rơbô tơmàn đong. Đơs tàm dơ̆ lơh broă, Củ tịc Quôk hội ồng Vương Đình Huệ đơs, ƀòn dờng Hà Nội là tiah sùm geh nùs nhơm geh kơnòl uă ngan bè tềm pềr, sơndră pơhì pơhà tàm jơh bal gah broă dà lơgar bal mờ broă làng bol. Tơngai tus, ƀòn dờng Hà Nội pal kờp sền wơl bañ lời pơhì pơhà bơta pràn ù tiah dê bè bă ù tiah lơh sa suơn sre ờ hềt ngui, bơta sơgràm, ngui ù tìs mờ kơrnoat boh lam ù lơh sa suơn sre; lơh gờñ broă lơh rơndap ù tiah, kờp sền nàng geh ù tiah ai bơtàu tơnguh, ngui niam uă ngan bơta pràn ù tiah dê.

Cau mblàng K’Hạnh