VOV4.K’ho- Drim 10/3, Ủy ƀan Thường vụ Quôk hội ai jơnau đơs tàm rơndap lơh Kơrnuat boh lam bè rơndap sap sèng, sră nggal sền sơ wì, lơh nền ai cau ngir ma tuý tơl bơh 12 sơnam tus hơ đơm 18 sơnam mut tàm anih tơn jơh ngir pal mut.

Đơs mut pơrjum, Củ tịc Quôk hội ồng Vương Đình Huệ pà git, Ủy ƀan Thường vụ Quôk hội neh lam lơh broă rơndap lơh mờ dan jơnau đơs tàm 6 mpồl broă. Jat tàm sră đùh ring bal neh lơh nền 2 mpồl broă lùp Ƀộ trưởng Ƀộ Kông thương ồng Nguyễn Hồng Diên mờ Ƀộ trưởng Ƀộ Tài nguyên mờ Môi trường ồng Trần Hồng Hà. Tàm dơ̆ pơrjum àng drim, Ủy ƀan Thường vụ Quôk hội ring bal mờ bơta kuơmàng pal ai tơlik kơrnuat boh lam bè rơndap sap sèng, sră nggal sền sơ wì, lơh nền ai cau ngir ma túy tơl bơh 12 sơnam tus hơ đơm 18 sơnam mut tàm anih tơn jơh ngir ma túy pal mut. Bulah bè hơ̆, jat ală kwang bàng đơs, cau geh tam gơl bơh jơnau rơcang cih kơrnuat boh lam dê là cau ngir ma túy tơl bơh 12 sơnam tus hơ đơm 18 sơnam mờ broă ai khi mut tàm anih tơn jơh ngir ma túy pal mut ờ di là broă lơh hàñ cíñ, den tàng pal ai tơnggŏ bơta krơi is do, sră nggal rềp mềr, niam chài mờ gàr bơta kuơ niam ngan rlau jơh ai cau gơtìp sồr in.

Cau mblàng K’Duẩn