Tus còp tiah lời wơl dà lơgar kwơ màng bàr gah dà dờng Hiền Lương – Bến Hải, Củ tịc Quốk hội Gơnoar atbồ Làng bol lơgar Cuba bal mờ Mpồl kwang bàng kấp dờng lơgar Cuba neh boh bơr mờ kwang bàng, Làng bol tàm càr do, sền Bồng bi lơgar Việt Nam gam par tềng ñjrong yồng bồng bi Hiền Lương.

Boh bơr mờ ală kơnòm bơsram tềng ñjrong yồng bồng bi Hiền Lương, Củ tịc Quốk hội Gơnoar atbồ Làng bol lơgar Cuba bal mờ Mpồl kwang bàng kấp dờng lơgar Cuba neh yal wơl jơnau lời kir bè dơ̆ tus còp bơh ồng Fidel Castro, Kwang bàng jăk chài lơgar Cuba dê tus tàm tiah tơnklàs Quảng Trị, còp uă tiah tŭ ù tiah do kung gam ƀô siao phào mờ gam uă phào crong. Củ tịc Quốk hội Gơnoar atbồ Làng bol lơgar Cuba kung neh cih wơl ală nùs nhơm bơh să tờm dê bè dơ̆ tus còp càr Quảng Trị dơ̆ do tàm pang sră lời kir tàm Ƀảo tàng Tiah Tềl kah yau rài lài do Dà lơgar bàr gah dà dờng Hiền Lương – Bến Hải.