VOV4.K’ho - Tàm dơ̆ tus còp mùl màl lơgar Việt Nam, mho ngai òr (22/06), Củ tịc Quốk hội lơgar Mozambique bal mờ Mpồl kwang bàng dờng màng Quốk hội lơgar Mozambique neh tus còp mờ lơh broă tàm ƀòn dờng Cần Thơ.

Cri bơyai mờ Ƀí thư Thàñ ủy Cần Thơ, Củ tịc Quốk hội lơgar Mozambique đơs niam bè broă lơh git gơ̆p niam bơnĕ đah Quốk hội bàr lơgar Việt Nam mờ Mozambique bơh Sră nggal kah bal bè lơh broă bal đah Quốk hội lơgar Việt Nam mờ Quốk hội lơgar Mozambique. Bè broă lơh bal tàm tơngai tus, ồng Lê Quang Mạnh, Ƀí thư Thàñ ủy Cần Thơ pà git, tŭ lơi kung rơcang tam pà bal broă mờng chài ròng phan tàm dà mờ tam phan, jơnau git wă tàm broă lơh sa, lơh gơs phan, tơnguh uă khà lơh geh bal mờ bơta niam bơh ală phan geh lơh bơh broă lơh sa suơn sre, phan tàm dà; Lơh broă bơcri priă tơnguh bơtàu broă lơh sơntìl phan tam, phan ròng mờ phan tàm dà geh bơta niam uă, bơ̆t bơtàu tiah lơh sre kòi geh bơta niam uă jăt broă lơh bă sre dờng, lơh tiah ròng phan ờ do ờ dă mờ kòp, lơh broă bal, tam gơl bal broă mờng chài tàm broă lơh, prăp gàr, sền gàr phan geh lơh bơh broă lơh sa suơn sre, tơnguh bơta geh kwơ phan geh lơh bơh broă lơh sa suơn sre tờm, lơh broă bal, cri bơyai bal, kă bro phan geh lơh bơh broă lơh sa suơn sre.

Cau mblàng Ndong Brawl