Quân khu 9 lơh broă tàm ù tiah 12 càr, ƀòn dờng Tiah ring dà dờng Cửu Long, geh kuơ dờng ngan. Tàm rài tam lơh tơngklàs dà lơgar, ling klàng mờ làng bol Quân khu 9 neh geh ală tă pơgồp dờng màng ngan tàm pha lin pơnrơ dờng ngan jơi bơtiàn dê. 

Đơs tàm dơ̆ lơh broă, Củ tịc Quôk hội ồng Trần Thanh Mẫn tơngkah, Quân khu 9 pal jơh nùs tus bal dong làng bol tơn jơh jơgloh, tơrmù rƀah, bơt bơtàu ƀòn lơgar pa, bơtàu tơnguh niam chài – mpồl bơtiàn; rơcang lài pleh mờ bơsong jơnau gơ lời wơl bơh trồ tiah lơh aniai, dà kŏ dà cò, kòp bơtờp, jòi dong kờl cau gơtìp rềs àr. Pơgồp bal mờ mpồl kwang àng, mpồl ling sền gàr tiah nhàr dà lơgar, ală mpồl lơh broă bơh Ƀộ  geh gơ rềng mờ gơnoar atbồ tàm ƀòn lơgar, jơh nùs rơcang lài kơryan cau tìs, bơt bơtàu ù tiah lơngăp lơngai gơ jat bal mờ mpồl ling lơngăp lơngai; rơcang lài kơryan jơh tơl kai dră wơl bơh ală mpồl sò tơm dê. Củ tịc Quôk hội sồr, Quân khu 9 sùm sền gròi niam rài kis phan bơna, nùs nhơm bơh kwang bàng, cau ling dê. Lam lơh niam broă lơh dong kờl ling klàng.