Pơn jat tai broă lơh pơrjum dơ̆ 36, drim ngai 21/08, tàm Hìu Quôk hội, bơh bơta đơng lam bơh Củ tịc Quôk hội ồng Trần Thanh Mẫn, Anih duh broă Lơh kơnòl broă sùm Quôk hội bơyai lơh dơ̆ pơrjum lùp mờ hơ jơnau lùp broă lơh jat ală jơnau neh lơh nền tàm pơrjum bơh Anih duh broă Lơh kơnòl broă sùm Quôk hội dê bè jat sền mìng dùl tơngume mờ lùp mờ hơ jơnau lùp bơh bồ tơngai lơh broă Quôk hội khoă XV tus jơh nam 2023.

Đơs tàm dơ̆ pơrjum lùp mờ hơ jơnau lùp, Củ tịc Quôk hội ồng Trần Thanh Mẫn pà gĭt: do là dơ̆ sơnrờp tàm tơngai lơh broă Quôk hội khoă XV, Anih duh broă Lơh kơnòl broă sùm Quôk hội lam lơh broă lơh “Jat sền wơl”, tơngŏ kơnòl bơh Anih duh broă Lơh kơnòl broă sùm Quôk hội dê tàm broă jat sền tus lồi dŭt broă lơh jat jơnau sồr, jơnau đơs bơh Quôk hội, Anih duh broă Lơh kơnòl broă sùm Quôk hội dê. Bơh hơ̆, đơs tơl làm, lơh loh ală kal ke, kòl yan tàm tŭ lơh jat, tă bơsong di tŭ, tơnguh uă rlau tai kơnòl bơh ală anih lơh broă kong bơta jat sền dê. Củ tịc Quôk hội pin dờn ală Mpồl cau ala mat Quôk hội mờ bồ tơngoh jak, nùs nhơm bơt bơtàu, đơs jơnau bơceh lơh ai Cíñ phủ, ală Ƀộ trưởng, Kwang atbồ gah broă in tàm đơng lam, sồr lơh, bơsong ală bơta ờ hềt pràn, bơsong ală bơta kal ke, kòl yan. Ală kwang bàng Cíñ phủ, ală Kwang atbồ gah broă pơn jat tai tơngŏ nùs nhơm geh kơnòl, pơnđơl pràn lơh ngan uă ngan rlau jơh, hơ song dơ pă, di broă, đơs kơnòl broă, broă lơh lơh jat tus geh ală jơnau kờñ, kơnòl broă bơh Quôk hội, Cíñ phủ dê ai bơh nam 2024 mờ Jơnau lơh nền tàm pơrjum dờng dơ̆ 13 bơh Đảng dê.