Củ tịc Quôk hội ồng Trần Thanh Mẫn neh jàu pà gai lòng 40 sơnam Đảng ai Phó Củ tịc Quôk hội ồng Nguyễn Đức Hải in; Ƀí thư Đảng ủy anih lơh broă Cơl dŭ lơh broă Quôk hội ồng Bùi Văn Cường jàu gai lòng 30 sơnam Đảng pà đảng viên ồng Đặng Vũ Hải, Phó Vụ trưởng Vụ Jơi bơtiàn.

Đơs gờm chờ ală đảng viên tàm dơ̆ jàu, Củ tịc Quôk hội ồng Trần Thanh Mẫn đơs nền, jờng rơ kwơ màng 40 sơnam mờ 30 sơnam Đảng là bơta cih dờp, đơs nền, jờng rơ uă ngan bơh Đảng dê gơwèt mờ broă lơh tă pơgồp dà kơl hề, tă pơgồp bơh 2 nă ồng do dê mờ broă lơh kăc màng pơn rơ ngan bơh Đảng dê. Củ tịc Quôk hội ồng Trần Thanh Mẫn kơ̆p kờñ, ală đảng viên geh jàu gai lòng Đảng, pơn jat tai geh ală tă pơgồp jơh nùs jơh tồr ngan nàng bơtàu tơnguh cồng nha lơh broă bơh Quôk hội, Ủy ƀan Thường vụ Quôk hội, Mpồl duh broă Jơi bơtiàn, ală Ủy ƀan bơh Quôk hội, ală Mpồl gơwèt Ủy ƀan Thường vụ Quôk hội tàm broă lơh jat ală gơnoar broă lơh adat boh lam, jat sền, lơh nền ală broă kwơ màng bơh Dà lơgar dê; pơgồp bơnah bơt bơtàu Dà lơgar gơnoar adat boh lam xã hội củ nghĩa làng bol dê, bơh làng bol mờ tài làng bol.