Sền wơl cồng nha bơtàu tơnguh lơh sa mpồl bơtiàn dà lơgar đơs bal mờ càr Bình Phước đơs is, Củ tịc Quốk hội ồng Trần Thanh Mẫn đơs là, tàm cồng nha bal hơ̆, geh broă pơgồp bal pràn bơh Mpồl duh broă làng bol càr, broă tus bal, jơh nùs, geh kơnòl bơh ală kwang bàng Quốk hội khoă 15 càr Bình Phước dê.

Mpồl duh broă làng bol càr Bình Phước neh sùm lơh jăt nền nòn jơnau đơng lam, sồr lơh bơh Dà lơgar dê mờ geh uă tam gơl pa tàm broă lơh; geh cồng nha lơh broă bơh Mpồl duh broă làng bol ală kấp dê geh gơguh sùm; tam gơl pa bè broă lơh bal mờ tơngu me broă lơh. Củ tịc Quốk hội ồng Trần Thanh Mẫn sồr càr Bình Phước pal pơgồp bal nền nòn đah bơtàu tơnguh lơh sa niam chài, mpồl bơtiàn mờ broă sền gàr dà lơgar, lơngăp lơngai, lơh broă bal mờ lơgar ndai, tàm hơ̆ uă ngan là broă lơh bal mờ lơgar ndai gùng nhàr dà lơgar ring lơngai, git gơ̆p, lơh bơyô bal, lơh broă bal, bơtàu tơnguh mờ lơgar Campuchia; Drơng gàr rài kis phan bơna, nùs nhơm ai làng bol in, tàm hơ̆ uă ngan là làng bol jơi bơtiàn ờ gal cau tàm càr; lơh niam broă lơh sa, bơta kwơ mpồl bơtiàn, rơng gàr cau geh màng mờ dà lơgar.