Tàm dơ̆ wă, Củ tịc Quốk hội ồng Trần Thanh Mẫn đơs nền Đảng, Dà lơgar mờ Làng bol lơgar Việt Nam sền sền kwơ mờ kơ̆p kờñ bal mờ Cíñ phủ mờ làng bol lơgar Hàn Quốk pơn jăt tai bơtàu tơnguh jrô ơnàng, mùl màl mờ geh cồng nha rơlao tai bơta git gơ̆p Tam klăc bal Jŏ jòng Tơl ală bơta mờ lơgar Hàn Quốk.

Tŭ do, lơgar Hàn Quốk là lơgar kă bro phan dờng dơ̆ pe lơgar Việt Nam dê (mìng tơnơ̆ lơgar Lo mờ lơgar Mỹ). Nam 2023, priă bơh kă bro phan bàr đah geh 76 tơmàn dolar Mỹ, 6 nhai bồ nam geh mờr 40 tơmàn dolar Mỹ. Jơnau kờñ bàr lơgar tơnguh khà kă bro phan bal đah bàr lơgar tus 100 tơmàn dolar Mỹ tàm nam 2025 mờ wèt tus jơnau kờñ 150 tơmàn dolar Mỹ tàm nam 2030 jăt gùng dà broă lơh ndrờm bal, kơl jăp. Củ tịc Quốk hội ồng Trần Thanh Mẫn sồr tàm tơngai tus, bàr đah tơnguh broă tìp bal, pơgơl bal mpồl kấp dờng mờ ală kấp, ală mpồl nghị sĩ git gơ̆p lơh bơyô đah lơgar Việt Nam mờ lơgar Hàn Quốk, lơgar Hàn Quốk mờ lơgar Việt Nam, mpồl nghị sĩ git gơ̆p kơnòm să… tàm ală gah broă lơh adăt boh lam kung bè broă jăt sền.