Củ tịc Quôk hội ồng Trần Thanh Mẫn đơs nền, tàm kah yau bơtàu tơnguh bơh pe lơgar dê, bơta tam klac bal kuơmàng, bơta git gơp lơh bơyô lơgar rềp bal, ờs mờng mờ lơh broă bal tơl làm đah pe Đảng, Dà lơgar, làng bol mờ cau ùr pe lơgar là bơta kuơmàng ngan gàr bơta bơtàu tơnguh tàm tơl lơgar mờ tiah do. Đảng, Dà lơgar mờ làng bol Việt Nam sùm sền dờng màng, sền gàr mờ sơlơ tơnguh tai bơta git gơp lơh bơyô ờs mờng mờ Đảng, Dà lơgar, Làng bol lơgar Lào mờ lơgar Campuchia. Củ tịc Quôk hội chờ hờp sền gŏ bơta git gơp lơh bơyô ờs mờng bơh pe lơgar mờ Mpồl cau ùr pe lơgar ngai sơlơ bơtàu tơnguh. Mpồl cau ùr pe lơgar neh geh uă broă lơh cribơyai ngan ngồn pơgồp bơnah sơlơ tơnguh rlau tai bơta git gơp mờ lơh geh bơta bơtàu tơnguh bơh cau ùr tàm tơl lơgar, kuơmàng là broă kĭ mờ lơh jat jơnau ring bal lơh broă bal tơngai bơh nam 2022 tus nam 2027 mờ ală tơngume ngan ngồn, lơh jat bơta kơp kờñ bơh cau ùr mờ Mpồl cau ùr pe lơgar dê.