Củ tịc Quôk hội ồng Trần Thanh Mẫn đơs nền, Việt Nam sùm sền lơgar Mỹ là lơgar lơh broă bal geh gơnoar broă kwơ màng jŏ jòng, mờ jờng rơ lơgar Mỹ pơn jat tai hơ dong kờl dùl lơgar Việt Nam pràn, lơngăp lơngai is, lơh pràn is mờ pas gơs. Tơngai pa do, ală broă lơh tìp mat mờ tàm pơgơl mpồl kwang bàng geh sơlơ tơnguh tai tàm jơh ală gah, ală kấp.

Tàm tơngai tus, Củ tịc Quôk hội ồng Trần Thanh Mẫn sồr 2 gah lam lơh geh cồng nha Jơnau yal bơr bal mờ Broă rơndăp lơh lơh broă Việt Nam mờ Mỹ nàng wèt tus tơngkah kir sơnrai 30 nam lơh bơta gĭt gơ̆p cribơyai broă mờ lơgar ndai 2 lơgar tàm nam 2025. Quôk hội 2 lơgar pal sơlơ tơnguh tai tàm pơgơl mpồl kwang bàng kấp dờng mờ ală kấp. Củ tịc Quôk hội sồr, lơgar Mỹ pơn jat tai sền sơ wì jơh nùs dờp kơrnoat boh lam lơh sa drà kă bro bơh lơgar Việt Nam dê; gờñ ai lơgar Việt Nam lik bơh sră ală lơgar gơtìp ờ hoan ai tăc phan mờ lơgar ndai mờ măi mok pa.