Tàm ƀòn dờng yau Quảng Trị, Củ tịc Quốk hội ồng Vương Đình Huệ bal mờ mpồl kwang bàng lơh broă neh kah kơlôi, ưn ngài broă lơh dờng màng bơh ală Cau ling khin cha jăk chài, cau ling chơ̆t màng neh phi să tàm dơ̆ tam lơh 81 ngai mang (nhai 9 nam 1972), tam lơh mờ sền gàr thị xã Quảng Trị. Tàm dơ̆ tam lơh 81 ngai mang cui rơcai hơ̆, git nđờ rơbô nă cau ling tơnklàs dà lơgar bơh gùt lơgar bal mờ làng bol càr Quảng Trị neh tam lơh khin cha jăk chài, phi să, ơm wơl tàm bă ù do.

Củ tịc Quốk hội ồng Vương Đình Huệ bal mờ mpồl kwang bàng lơh broă neh chu ñàng, pơdơng bơkào tàm ƀlàng tơ̆p ƀồc Cau ling chơ̆t màng dà lơgar Trường Sơn. Do là anih ơm rơlô dŭt ndơl bơh ală cau ling chơ̆t màng gùt lơgar dê, phi să tàm rài tam lơh mờ ling lơgar Mỹ sò tơm, tơnklàs dà lơgar. Geh uă ngan là ală cau ling chơ̆t màng tàm ƀlàng tơ̆p ƀồc do geh ƀòn tờm bơh ală càr, ƀòn dờng hờ đah tô dà lơgar. Củ tịc Quốk hội bal mờ mpồl kwang bàng lơh broă neh chu ñàng, pơ dơng bơkào tàm Ƀlàng tơ̆p ƀồc Cau ling chơ̆t màng dà lơgar Gùng 9, do là anih ơm rơlô dŭt ndơl bơh ală cau ling khin cha jăk chài, cau ling chơ̆t màng neh geh tŭ tus tam lơh, drơng broă tam lơh tàm tiah tam lơh Gùng 9 mờ tàm ù tiah lơgar Lào tàm rài tam lơh mờ ling lơgar Mỹ sò tơm, tơnklàs dà lơgar.