Củ tịc Quốk hội ồng Vương Đình Huệ bal mờ Mpồl kwang bàng neh tus sền anih ràng tơlik ală bơta phan, rùp gơrềng tus rài kis bal mờ broă lơh kăc màng, yal ală bơta kwơ nùs nhơm bơh Kwang đơng lam jăk chài Fidel Castro dê bal mờ nùs nhơm niam bơh Kwang đơng lam Fidel Castro dê lời ai lơgar Việt Nam in.

Anih tờm Fidel Castro geh lơh mờ ai ngui di tàm dơ̆ tơnkah 5 nam ngai chơ̆t ƀồc ồng Fidel Castro (25.11.2016 – 25.11.2021). Do là anih sơnrờp ngan mờ mìng geh dùl anih do geh măt sơnđan kwang đơng lam kăc màng jăk chài bơh Làng bol lơgar Cuba dê. Dà lơgar Cuba neh tơlik ờ uă kơrnoăt kwơ màng bè broă lơh anih do tài kơ̆p kờñ tŭ gam kis bơh ƀồc ồng Fidel dê là tơnơ̆ mờ tŭ chơ̆t, ờ geh gùng tàm ƀòn dờng, ƀlàng nhơl, hìu bơsram, hìu sơnơm ha là ală anih lơi, tiah lơi geh măt sơnđan ồng dê.