VOV4.K’ho - Tàm dơ̆ tus còp mùl màl lơgar Lào, mho òr (17/05), Củ tịc Quốk hội ồng Vương Đình Huệ bal mờ Mpồl kwang bàng dờng màng Quốk hội lơgar he neh tus còp hìu bơsram Dân tộc nội trú càr Champasak.

Hìu bơsram phổ thông dân tộc nội trú càr Champasak là dùl tàm ală hìu bơsram là phan pà bơh Cíñ phủ bal mờ làng bol lơgar Việt Nam dê ai Cíñ phủ bal mờ làng bol lơgar Lào in. Hìu bơsram phổ thông dân tộc nội trú càr Champasak geh crơng gơs bơh nam 1999, tus tŭ do, hìu bơsram do neh pơgồp bal tàm broă bơto uă oh kòn làng bol ală kòn cau lơgar Lào bơh 4 càr đah jum lơgar Lào in. Hìu bơsram neh geh uă cồng nha niam tàm broă bơto mờ bơsram. Tàm hơ̆ uă ngan là sền kwơ tàm broă bơsram dà lơgar Việt Nam. Hìu bơsram Dân tộc nội trú càr Champasak tŭ do geh rơlao 900 nă kơnòm bơsram, gơwèt 14 jơi bơtiàn kòn cau.

Củ tịc Quốk hội ồng Vương Đình Huệ pà git, bàr Đảng, bàr dà lơgar ai uă ngan broă lơh nàng tơrgùm uă bơta pràn ai broă bơto, bơsram nàng tơnguh bơtàu cau lơh broă, di pal mờ broă kờñ bơh tơngai pa dê. Bè jơnau dan bơh hìu bơsram tơnguh khà priă bơsram, pơn jăt tai dong kờl, lơh niam wơl, lơh pa phan bơto mờ bơsram ai hìu bơsram in. Củ tịc Quốk hội ồng Vương Đình Huệ neh dờp mờ jào Đại sứ quán lơgar Việt Nam tàm lơgar Lào bal mờ ală anih lơh broă tàm Ủy ƀan Lơh broă bal bàr Cíñ phủ kơlôi sơnơng mờ sền wơl nàng rơhời geh bơsong. Di tàm dơ̆ do, Củ tịc Quốk hội ồng Vương Đình Huệ neh jào phan pà ală kơnòm bơsram, bơsram jăk dà lơgar Việt Nam tàm hìu bơsram dê; pà hìu bơsram phan pà, tàm hơ̆ geh sră măi, phan bơto mờ bơsram ai hìu bơsram in geh 320 tơlăk đong.

Cau mblàng Ndong Brawl