VOV4.K’ho- Drim ngai 08/02, Củ tịc Quôk hội ồng Vương Đình Huệ lòt còp, gờm chờ nting bơr sa tềp tàm Tập đoàn Tàñ mai phan Việt Nam (Vinatex). Ala măt kwang bàng đơng lam bồ Đảng, Dà lơgar, Quôk hội, Ủy ƀan Thường vụ Quôk hội, Củ tịc Quôk hội ồng Vương Đình Huệ jơh nùs gờm chờ cồng nha lơh geh uă ngan, niam ngan mờ gah tàñ mai phan dê neh lơh geh tàm nam 2021.

Tàm tơngai tus, Củ tịc Quôk hội ồng Vương Đình Huệ sồr, Vinatex pal ai jơnau bơsram mờng chài kwơ, gĭt jăt tŭ tơngai niam, gùng dà tàm tam gơl ală anih lơh gơlik phan ndrờm pal dà lơgar kung bè bơta gơrềng ală anih lơh gơlik phan tàñ mai tàm gùt plai ù; bơdìh mờ drà kă bro tăc mờ lơgar ndai, tập đoàn pal sền gròi rlau tai drà tàm dơlam lơgar bal mờ mờr 100 tơlak nă làng bol. Củ tịc Quôk hội ồng Vương Đình Huệ kơ̆p kờñ, Vinatex pal pơn jăt tai lơh kơ̆ kơl jăp, bơ̆t bơtàu bơta gĭt gơ̆p lơh broă bơnĕ bơnài, kơ̆ kơl jăp mờ gơguh jak tàm mpồl lơh sa kă bro. Tơnguh tai broă lơh bơ̆t bơtàu Đảng ƀộ sàng goh, pràn kơldang, ngui niam gơnoar broă bơh mpồl kông đoàn dê tàm broă bơtòm tơrgùm, tam klăc bơ̆t bơtàu rơnàng kông ñân Việt Nam jak chài pa, dờng pràn, mpồl cau lam lài tàm tŭ lơh jăt kơnòl broă bơtàu tơnguh mhar mờ kơ̆ kơl jăp jŏ jòng.

Cau mblàng Lơ Mu K’Yến