VOV4.K’ho- Mho ngai 07/02, Củ tịc Quôk hội ồng Vương Đình Huệ neh lòt còp mờ lơh broă mờ Tổng kụk II, Ƀộ Quôk phòng. Nàng Tổng kụk pơn jăt tai lơh jăt jai pha kơnòl broă nam 2022 mờ ală nam pơn jăt tai, Củ tịc Quôk hội ồng Vương Đình Huệ sồr, jơh gùt Tổng kụk kơlôi sơnơng jrô ơnàng, lam lơh jăt di tŭ mờ geh cồng nha Kơrnoăt, Jơnau sồr, broă tờm là Kơrnoăt sồ 48 bơh Ƀộ Cíñ trị dê mờ Kơrnoăt sồ 160 bơh Thường vụ Quân ủy Dà lơgar dê “Bè đơng lam lơh broă Jòi sền jơnau ndơ̆p ndơr Sền gàr dà lơgar lơh di jơnau sồr, kơnòl broă tàm tŭ tơngai pa”, lơh ngan pơđơl pràn mờ bơta jơh nùs uă ngan rlau jơh, lơh gơs niam mờ jak ngan kơnòl broă cíñ trị, lơh geh cồng nha nam 2022 pal jơnhoa rlau mờ nam 2021.

Tổng kụk II pal pơn jăt tai bơ̆t bơtàu Jòi sền jơnau ndơ̆p ndơr Sền gàr dà lơgar sùm là mpồl lơh broă pin dờn ngan, dòn song ngan mờ Đảng, mờ Dà lơgar mờ Làng bol; kơ̆ kơl jăp bè cíñ trị bồ tơngoh, kơ̆ kơl jăp bè bơta pal jăt, rơndăp wơl, pràn kơldang kơ̆ kơl jăp, sàng goh bè mpồl kwang bàng, pràn bè bơta ling klàng, cồng nha uă, rơcăng dờp mờ lơh sir gơs jak ngan jơh ală kơnòl broă mờ Đảng, Dà lơgar, Mpồl ling mờ Làng bol jàu kơnòl.

Cau mblàng Lơ Mu K’Yến