Củ tịc Quôk hội ồng Vương Đình Huệ tơnggŏ bơta chờ hờp tŭ tus còp Thượng Hải, ƀòn dờng mìng geh ờ tus 0,1% bă ù ơ nàng bơh lơgar Lo dê mơya là ƀòn dờng gal làng bol ngan rlau jơh, geh khà priă tàm pơndrờm GDP dờng mờ lam lài tàm broă tam gơl pa, pờ mpồng, bơceh lơh jak chài bơh lơgar Lo dê. Do kung là tiah mờ Tổng Ƀí thư, Củ tịc lơgar Lo ồng Tập Cận Bình ai tơlik gùng dà broă lơh bè rài làng bol lơh tờm tàm jơh tŭ tơngai lơh broă mờ lơh jat gùng dà broă lơh do, ală Anih tờm sùm sền gròi broă tơrgùm wơl jơnau đơs tă pơgồp bal uă ngan bơh ală rơnàng làng bol dê tàm broă lơh adat boh lam.

Tus bal tìp mat cribơyai mờ ală cau geh bồ tơngoh jak mờ làng bol tàm tiah do dê bè lơh adat boh lam, Củ tịc Quôk hội ồng Vương Đình Huệ đơs bơta mờng chài lơh broă bơh lơgar Việt Nam dê tàm broă tă pơgồp jơnau đơs lơh Adat, pơnyơu bè Adat ù tiah (tam gơl) neh geh rlau 12 tơlak jơnau đơs tă pơgồp bal. Củ tịc Quôk hội pà gĭt rơ̆p sền sơwì ală mờng chài lơh broă bơh lơgar Lo dê mờ đơs nền Quôk hội Việt Nam rơ̆p ờ lời khat dùl jơnau đơs lơi bơh làng bol, mpồl lơh sa kă bro, bơh kwang bàng Quôk hội dê pơyoa tus mờ ờ geh iăt, kơno mờ mblàng lơh loh ngan ngồn.